كل بنى ادم وتفكيرة

في بلد تتولد فيها وبلد تعيش فيها لان حبايبك احياء او اموات موجودين فيها

وبلد تقضي فيها يومين لما تكون تعبان او تاخدلك فيها اسبوع في الصيف

ومسيرك ترجع منها وتسيبها

وفي بلد تفديها بروحك مع انك لااتولدت فيها ولا عمرك رحتها ولا تعرف فيها حد

بس حبايبك فيها صخور وشجر وبيوت

في واحد تصاحبه علشان لما تتخانق يقف ويضرب معاك

وفي واحد تصاحبه علشان تفتكر بيه ربنا

وفي واحد تصاحبه علشان يعرف اماكن اكل تحفه وكمان هو اللى بيعزمك دايما

وفي واحد تصاحبه علشان يكون في اصحابك حد محترم

وفي واحد تصاحبه علشان امك وابوك والدنيا كلها بتقولك (متصاحبش الواد دة)

في دمعه بتغلبك وتفر من عينك وانت بتحارب علشان تكتمها

وفي دمعه بتتحايل عليها علشان تنزل وهى مش عاوزة تتكون في عيونك اصلا

وفي دمعه بتنزلها ادام الناس اللى بيحبوا يشوفونا بندمع علشان نريحهم مش اكتر

وفي دمع مش بتنزل من عينك ولا تتكون بس بيشوفها كل اللى بيحسوا حواليك

في ركعتين تصليهم علشان تحل في الامتحان

وفي ركعتين تصليهم علشان عايز انك واقف بين ايد الجبار

وفي ركعتين تصليهم علشان محتاج تفضفض

وفي ركعتين تصليهم علشان امك مش مقتنعه ان انت صليت

وانت جاى من برة ومش هتسكت غيرلما تشوفك بتصلي

وفي بنت تحبها وتغنى اسمها وترسم لها صورة في دفتر دروسك من قبل ماتشوفها

وفي بنت تعرفها علشان (((معرفه الرجال كنوز)))

وفي بنت ماينفعش غيرها يكون نصك التانى وام عيالك

وفي بنت بتدور عليها وتحاول تعرفها علشان اصحابك كلهم

يعرفوا بنات وانت لا

في كلام بتكتبه لروحك

وكلام بتكتبه لحد

وكلام بيتكتبلك

وكلام لابتكتبه ولا بيتكتبلك بيتحس بس!!