اسباب حب الرجاله في القهوة

لعل المراه تندهش من الرجل الذي يتركها فجأة وينزل من البيت ولا يطيق ان يجلس مع مامتها اللى هى حماته ويستمتع بالقفشات اللذيذة وخفه دمها وبساطتها في التاعمل وروحها المرحه "ده من وجهه نظر الزوجه طبعا" بينما يتركها وينزل يجلس علي القهوه واصحابه الرجاله المقاطيع وسط دوشه وكراسي خشب متعبه ودخان كتير "وده ايضا من وجهه نظر المرأة "  بينما لاتعرف ان هناك 5 اسباب تجعل الرجل عاشقا للمقهى مهما كان بسيطا ولا تتوافر فيه سبل الراحه .

اول حاجه لايرفض للرجل طلب علي القهوة

بالطبع عمر الرجل ما يقعد علي القهوة ويقول للقهوجى واحد شاي سكر بره يرد عليه القهوجى :

انا تعبان قوم اعمل انت

وبالمرة وانت واقف هتلاقي كوبايات في الحوض اغسلها

ومتنساش ترجع كوبايتك المطبخ وتغسلها مش هجري ورا كوبايات الشاي اللي بتسيبها في كل مكان

فهذة الجمله الطويله السابقه يسمعها الرجل في البيت حتى ولو كانت زوجته صحتها بمب ولكنه لن يسمعها علي القهوة مطلقا حتى ولو كان القهوجى تعبان بالفعل ووراة مواعيد  فالرجل  يامر فيطاع علي المقهى ولكنه يامر فمراته تسقعله في البيت وعمرة مايطلب حاجه وتتنفذ علي طول لازم رغى وكتر كلام ومقاوحه ورفض .

يتكلم الرجل علي القهوة براحته

لن يمكن ان يحكى الرجل عن مديرة البصباص اللى ماشي مع السكرتيرة ليجد صديقه الجالس بجانبه علي القهوة يقوله :

تلاقيك انت كمان زيه

صنف نمرود ميملاش عينه الا التراب

مانتوا عجينهه واحده

بوريه من الرجاله بوريه

ايوة ياخويا اعمل انك مش سامع

استعبط ياخويا استعبط

ياما تحت السواهى دواهى

فهذة الجمله يسمعها في المنزل رغم انه لا يبد اعجابه بالسكرتيرة ولكنه يحكى عن مديرة البصباص فينتقد ذلك ولكن مراته تقف له علي الواحده وهات ياتقطيم ورمى كلام وتجريح علي الفاضي.

لكن علي القهوة يتكلم الراجل براحته ولا يفكر قبل ان ينطق ولا يخاف من ان يقول :

يارب الاهلي يكسب اسمنت اسيوط

فإذا قالها في المنزل فسيجد كائنا منعكشا خارجا من المطبخ ولابس مريله ويقوله :

مالك مش طايق الاسايطه ليه ..دوسنا علي ديلك

الرجل علي القهوة بيتصرف براحته

هل يمكن ان الراجل لما يروح يقعد في اى ركن في القهوة يجي القهوجى يقوله :

لو سمحت قوم من هنا علشان لسه منضف الحته دى

لاطبعا عمر القهوجى مايقول كده  الزوجه بس هى اللى ممكن تقول لجوزها :

ماتقعد في حته تانيه

حبكت القرايه دلوقتى

دا انا حيلى اتهد في تنظيفها وترتيبها

وهنا ينظر الرجل الي السماء ويسال سؤال بديهيا جدا :

ياربي يعنى علشان هى منضفه يبقي انا مقعدش علشان علشان موسخش المكان لازم يعنى اقعد في حته متوسخه ..امال هى بتنضف علشان مين؟؟

فالرجل علي القهوة يقوم ويغير مكان الكراسي ويطلب اللى هو عاوزة ويوسخ الارض لكن في البيت عكس دة تماما

دا لو وقع منه لبيسه قلم علي الارض فلا داعى ذكر ماتقوله له زوجته تكفى نظرتها لكى تجعله يتنطرويفز ويتكفي علي الارض يجيب اللبيسه ببوزة